|
Wee, sleeket, sowran, tim'rous beastie,
O, what a panic's in thy breastie!
Thou need na start awa sae hasty,
Wi' bickering brattle!
I wad be laith to rin an' chase thee,
Wi' murd'ring pattle!
I'm truly sorry man' dominion
Has broken Nature's social union,
An' justifies that ill opinion,
Which makes thee startle
At me, thy poor, earth-born companion,
'An fellow mortal!
I doubt na, whyles, bur thou may thieve;
What then? poor beastie, thou maun live!
A daimen-icker in a thrave
'S a sma request:
I'll get a blessin wi' the lave,
An' never miss 't!
Thy wee-bit housie, too, in ruin!
It's silly wa's the win's are strewin!
An' naething, now, to big a new ane,
O' foggage green!
An' bleak December's winds ensuin,
Baith shell an' keen!
Thou saw the fields laid bare an' wast,
An' weary winter comin fast,
A' cozie here, beneath the blast,
Thou thought to dwell,
Till crash! the cruel coulter past
Out thro' thy cell.
That wee-bit heap o' leaves an' stibble,
Has cost thee monie a weary nibble!
Now thou's turn'd out, for a' thy trouble,
But house or hald,
To thole the winter's sleety dribble,
An' cranreuch cauld!
But Mousie, thou art no they-lane,
In proving foresight may be vain:
The best laid schemes o' mice an' men
Gang aft agley,
An' leav'e us nought but grief an' pain,
For promis'd loy!
Still, thou art blest, compar'd wi' me!
The present only toucheth thee:
But och! I backward cast my e'e,
On prospects drear!
An' forward, tho' I canna see,
I guess an' fear!
~Robert Burns~
 HalloweensJaneDoe · Tue Apr 04, 2006 @ 12:00am · 0 Comments |
